Kanjutkundang mangrupa kumpulan hasil karya 42 pangarang Sunda dina wangun puisi, prosa, jeung drama, tur dilengkepan ku riwayat hirupna. Disusun ti nu pangkolotna (Caraka, lahir 1902) nepi ka nu pangngorana (Ayatrohaédi, lahir 1939). Ieu buku munggaran terbit taun 1963, satengah abad ka tukang, disusun ku Ajip Rosidi jeung Rusman Sutiasumarga, dua sastrawan Sunda nu waktu harita masih kénéh ngora. Penerbitan édisi emas minangka pangéling-ngéling kana karancagéan para pangarang Sunda, anu réréana kungsi dimuat dina majalah sarta suratkabar Sunda période 1949-1959. Ku panyusunna, Kanjutkundang téh diajamkeun pikeun jadi dokuméntasi sastra anu bisa dibaca ku nu boga perhatian kana kamekaran kasusastran Sunda hususna sabada perang. Salian ti éta, Kanjutkundang téh dimaksudkeun pikeun méré bekel hirup (saluyu jeung judulna) pikeun jabang bayi—maksudna para pangarang entragan anyar, dina netepkeun ukuran jeung ajén-inajén kasusastran Sunda mangsa-mangsa nu bakal datang.